|
|
QUAND HO INCONTRE GESU’ CREST
Poch temp fa, e sarà un meset,
avniva giò da l’Usdalet.
L’era nota terd… e i creda
che un s’videva dlong do deda,
e senza freni nè fanèl,
quand l’hè scur us gira mèl.
An s’era gnenca arvat me pont,
cl’è succes quel che a v’arcont.
Tott un trat te mez d’la strèda,
a vegh ‘na roba illuminèda…
La mandeva un mocc ad sprai,
che, cridil, in s’è vest mai,
e s’una vosa mai sintida
da fermem ech la m’invida.
“O tu che viaggi per le vie del mondo,
solo… con questo buio profondo.
Deponi la tua “Fede” errata e stolta…
Fermati un istante, guarda e ascolta.
Io son Colui, che vive in Paradiso,
Colui che hai bestemmiato ed hai deriso…
Son Quello che ben pochi al mondo han visto…
Inginocchiati, carogna… Io son Cristo!”
U m’ha ciap ‘na tremarèla,
cl’è impussebil arcuntèla.
“Gesù Crest…?” Ho sobit dett:
---Pora me, a so bell e frett !---
Pò ho pens: Sia quel che sia,
a vòi cerchì da scapè via…
Ma vidend che um tniva d’oc,
am so bòt sòbit da snòc.
“Che um perdomna, Signurein !
L’è si libre che a m’arvein;
Ma ai prumèt che d’ora in po’
chi librac a ni legg piò.”
L’è stè zèt per un mumènt,
pò u m’ ha dèt, parland lènt lènt:
“Bè, ragazzo, son contento
del sincero pentimento…
con il quale mi prometti
che mi credi e mi rispetti;
ma dovrai sempre dar retta
al Papa e a tutta la sua “sètta”:
preti, frati, cardinali
ed altri bravi clericali,
ai quali Dio la grazia ha resa
di mangiare con la… Chiesa”.
Gesù Crest, i che lò e sbaia…
Se vidès tott c’la “marmaia”,
fra tènt guai e tènt miserie,
la va in gir in… “fuoriserie”,
i manda i “vaglia” in ogni chesa…
(…un mattone per la Chiesa).
(…care anime gentili,
aiutate i nostri asìli…)
(…fate un gesto di buon cuore,
date l’òbolo alle suore...)
(…umanissimi fratelli,
aiutate gli orfanelli…).
Ogni dè i cambia truvèda,
ma l’è sempre c’la sunèda.
U iè al sòre “circantomne”
che biasand mella curòmne,
al va in “circa” ogni moment
per fè i pranz in te convent;
tott i “frè”, sa chi barbòm,
biascicand cent uraziom
i va a tròva i cuntadèin
ando che i sa che u i’è un bon vèin,
e zuculand sa cal… ciavàte,
it scapa fura sa dal “gate”,
Signurein mi binidèt,
che se ai pèns um vin d’armèt.
Ech i qua, t’una parola,
quel chi ha fat ad la su scòla…!
Lò l’è mort e l’è stè in crosa
per sta genta vergognosa,
che te nom ad e Signor,
l’an cumbèina ad mell culor…
Ech e mònd cum l’è andè a fnì,
che se invece da murì
per insgnì la religiòm,
l’avess ciap in t’un bastòm…
un gni sarìa un’umanità,
pina ad vizie e ad falsità;
ma d’la genta religiosa
cla supòrta la su crosa,
per ave, cumè cus dis,
un’ènta vita in Paradis.
“Io morii, non lo nascondo,
per salvare tutto il mondo
e indicar col mio dolore
fratellanza, pace e amore…
Ecco, ho pianto ed ho sofferto
perche’ il Cielo fosse aperto
ai peccatori, ai convertiti,
ai redenti ed ai pentiti…
Io mi son sacrificato,
ma che cosa hanno imparato ?”
Un bel gnìnt, car e mi Crest:
e risulted u s’è già vèst !
Bsògna arcnòss addirittura,
che l’ha ciap ‘na fregadura…
Signurèin, che facia chès
Ma che prit d’un cert paes:
cumè quel ui n’è cent mella,
che sal ciacre is fà la vella,
e mandand i sta in arvèina
tott e scop d’la su duttrèina!
Ste “pritèin” un è cattiv…
Sol che ui pis ‘stè bèn da viv !
“Be’, se ciò che dici e’ vero,
io distruggo tutto il “clero”,
e mi scelgo altre persone,
per rifar la religione”.
--- E vo arfè la religiòm ?
Ai pens me s’un bel bastòm!
Gesù Crest, che um metta in prova…
Me ui ni fàc un’ènta nòva…
Ma ogni Vescve o Cardinèl,
ai dagh ‘na vanga d’un quintèl,
per vanghè sora i pudir
ch’i ha in parochia e tott in gir.
M’al “perpetue” e m’al… bigòte,
a ti s’ciaf un sach ad bòte,
ai romp agl’òse addirittura
e pò’ al bott t’la spazadura
e a m’ardus, i se, pien pien
fina dreina e Vatichen,
e ma quei che a trov i là…
bastunède in quantità.
Gesù Crest, all’impruvis,
u m’interòmp, um guèrda e um dis:
“Figlio mio, tu hai ragione!
Ecco, prendi un bel bastone…
Picchia pure a destra e a manca,
io ti lascio carta bianca
finchè tu, da cima a fondo,
hai ripulito questo mondo.
Ora il tempo m’è scaduto,
quindi vado e… ti saluto.”
E dè dopp a m’elz bèl bèl,
impugnand un manganèl
per fè un po’ ad “ciacabatèst”
cumè d’accord sa Gesù Crest…
ma an so gnènca a un pas da chesa,
che a scapozz t’una surpresa.
A vegh infati tott in gir
piò ad dusent… carabignir,
che videndme s’un bastòm,
i m’ha port drett in prisòm.
Pò ho savù che te paes,
c’la matteina… guerda e ches,
us tniva at c’la piazzètta
un cumizie… sa Pajetta.
Fat e sta che se più bèl,
vidend che aveva un “manganèl”,
pizzardòm e comunesta
i m’ha ciap per un fascesta,
e i m’ha t’nù, fina la sera
bèn rincius t’una galera.
L’è ste i sé che l’è andè a fònd
e mi pruget da cambiè e mònd.!
O’Brien Olmeda
da "La Bughida... de Paes" ("Il bucato del paese")
(Questa vuole essere una satira bonaria, speriamo che la Chiesa non
ce ne voglia, e, come ha fatto a qualche Prete che conosco, provochi
qualche sorriso… con le lacrime agli occhi per contenere le risate.
Ci appelliamo comunque alla “licenza Poetica” se il testo e’ un poco
“forte”).
|
|